زيارة لضريح جمال عبد الناصر

زيارة لضريح عبد الناصر


ِالسكة مفروشة تيجان الفل والنرجس
والقبة صهوة فرس عليها الخضر بيبرجس
والمشربية عرايس بتبكي والبُكا مشروع
مين ده اللي نايم وساكت والسُكات مسموع
سيدنا الحسين ولاَّ صلاح الدين ولاَّ النبي ولاَّ الإمام
دستور يا حراس المقام ولاَّ الكلام بالشكل ده ممنوع
أنا بأقول أنا مش ضليع في علوم الانضباط
أبويا كان مسلم صحيح وكان غبي
وكان يصلي على النبي عند الغضب والانبساط
أبويا كان فلاح تعيس في ليلة ضلمة خلِّفوه وفي خرقة سودة لفلفوه
وفي عيشة غبرة طلعوه ولصَّموه وطلسموه ودجِّنوه
وجهِّزوه وجوزوه على عماه
فكان مُحيَّر في هواه ما بين أمي وما بين الجاموسة
وكان يخاف يقتل ناموسة وكان خجول خجول
خجول لكنه كان دائما يقول أستغفر الله العظيم من باب الاحتياط
أبويا طلعتوه حمار فكان طبيعي يجيبني جحش
لا أعرف نبي من أجنبي ولا مين ما جاش ولا مين ما راحش
موسى نبي عيسى نبي محمد نبي وكل وقت وله آذان
وكل عصر وله نبي وإحنا نبينا كده من ضلعنا نابت
لا من سَماهم وقع ولا من نارها شابت ولا انخسف له القمر
ولا النجوم غابت أبوه صعيدي وفهم قام طلعه ظابط
ظبط على قدِّنا وعلى المزاج ظابط
فاجومي من جنسنا ما لوش مرا سابت
فلاح قليل الحيا إذا الكلاب عابت
ولا يطاطيش للعِدا مهما السهام صابت.
عمل حاجات معجزة وحاجات كتير خابات
وعاش ومات وسطنا على طبعنا ثابت
وإن كان جرح قلبنا كل الجراح طابت
ولا يطلوه العِدا مهما الأمور جابت